"Eta orain, zer" Komunitateak

Nola erantzun COVID-19aren krisiak planteatzen dizkigun erronkei? Zer eta nola egin hain konplexuak diren erronken aurrean, horien garrantzia oraindik ikusten ez den une honetan?

 

“Eta orain, zer” ekimenak, bere sorreratik, argi izan du hausnarketa partekatutik haratago joan nahi genuela. Hausnarketa beharrezkoa da, baina ez da nahikoa. Elkarri entzun, ulertu, elkarrekin pentsatu… behar dugu, baina baita elkarri eragin, elkarrekin antolatu eta konponbidearen parte izateko konpromisoa hartu ere.

Horretarako, irailean, hainbat jatorri eta jakintzatako pertsonek osatutako lau komunitate jarriko ditugu martxan. Lehenetsitako lau erronkari buruz interpelatuta daude, eta guztion onerako emaitza bat garatzeko prest daude. Komunitate hauen helburua elkarlanean prototipo bat egitea da, hau da, entzute-prozesu baten bidez identifikatutako eta komunitatean elkarrekin sortzeko prozesu batetik abiatuta garatutako irtenbideak gauzatzea.